Chandrashekhar Ashtakam श्री चन्द्रशेखर अष्टकम

चन्द्रशेखर चन्द्रशेखर चन्द्रशेखर पाहिमाम् ।
चन्द्रशेखर चन्द्रशेखर चन्द्रशेखर रक्षमाम्॥

रत्नसानु शरासनं रजताद्रि शृङ्ग निकेतनं
शिञ्जिनीकृत पन्नगेश्वर मच्युतानल सायकम् ।
क्षिप्रदग्द पुरत्रयं त्रिदशालयै रभि वन्दितं
चन्द्रशेखरमाश्रये मम किं करिष्यति वै यमः ॥1॥

पञ्चपादप पुष्पगन्ध पदाम्बुज द्वय शोभितं
फाललोचन जातपावक दग्ध मन्मध विग्रहं ।
भस्म दिग्द कलेबरं भव नाशनं भव मव्ययं
चन्द्रशेखरमाश्रये मम किं करिष्यति वै यमः ॥2॥

मत्तवारण मुख्यचर्म कृतोत्तरीय मनोहरं
पङ्कजासन पद्मलोचन पूजिताङ्घ्रि सरोरुहं ।
देव सिन्धु तरङ्ग श्रीकर सिक्त शुभ्र जटाधरं
चन्द्रशेखरमाश्रये मम किं करिष्यति वै यमः ॥3॥

यक्षराज सखं भगाक्ष हरं भुजङ्ग विभूषणम्
शैलराज सुता परिष्कृत चारुवाम कलेबरम् ।
क्ष्वेड नीलगलं परश्वध धारिणं मृगधारिणम्
चन्द्रशेखरमाश्रये मम किं करिष्यति वै यमः ॥4॥

कुण्डलीकृत कुण्डलेश्वर कुण्डलं वृषवाहनं
नारदादि मुनीश्वर स्तुत वैभवं भुवनेश्वरं ।
अन्धकान्तक माश्रितामर पादपं शमनान्तकं
चन्द्रशेखरमाश्रये मम किं करिष्यति वै यमः ॥5॥
भेषजं भवरोगिणा मखिलापदा मपहारिणं
दक्षयज्ञ विनाशनं त्रिगुणात्मकं त्रिविलोचनं ।
भुक्ति मुक्ति फलप्रदं सकलाघ सङ्घ निबर्हणं
चन्द्रशेखरमाश्रये मम किं करिष्यति वै यमः ॥6॥

भक्तवत्सल मर्चितं निधिमक्षयं हरिदम्बरं
सर्वभूत पतिं परात्पर मप्रमेय मनुत्तमं ।
सोमवारिद भूहुताशन सोम पानिलखाकृतिं
चन्द्रशेखर एव तस्य ददाति मुक्ति मयत्नतः ॥7॥

विश्वसृष्टि विधायिनं पुनरेवपालन तत्परं
संहरंतमपि प्रपञ्च मशेषलोक निवासिनं ।
क्रीडयन्त महर्निशं गणनाथ यूथ समन्वितं
चन्द्रशेखरमाश्रये मम किं करिष्यति वै यमः ॥8॥

॥ इति श्री चन्द्रशेखराष्टकम् सम्पूर्णम् ॥

Leave a Comment